История России - История России до конца XVI в.

i_022

Подлинник на пергамене; ветхий, на нижней части красно-желтые пятна; наклеен на бумагу; на обороте древним почерком: Князя Ярослова. Следы прикрепления печати - внизу пергамена отверстие и остаток бечевки. ЦГАДА, Гос. Древлехр., отд. I, рубр. III, № 1.

ДрРВ, I, № 2; СГГД, I, № 1; Сахаров, X, №12 (литографированное воспроизведение первых. 15 строк); Иванов, № 2 (литографированное воспроизведение); Шахматов, О языке, сс. 236 - 238; Моск. гл. архив Мин. ин. дел, табл. XV (фотомеханическое воспроизведение); Кутепов, с. [9] (фотомеханическое воспроизведение).

Основание датировки: Пресняков, cc. 70 - 72; Кочин, cc. 199 - 201, 210.



† Благословление от владыкы, покла[няни]е[1] от посадника Михаила, и от тысяцьскаго Кондрата, и от всѣго Новагорода, и от всѣхъ старѣишихъ, и от всѣхъ меньшихъ къ князю Ярославу. На семъ, княже, цѣлуи хрьстъ къ всѣму Новугороду, на цѣмь то цѣловали дѣди, и отци, и отець твои Ярославъ. Новъгородъ ти дѣржати въ старинѣ, по пошлинѣ. Что волостии всѣхъ новгородьскыхъ, того ти, княже, не держати своими мужи, нъ дьржати мужи новгородьскыми; а даръ имати тобе от техъ [10] волостии. А бес посадника тобе волостии не раздавати. А кому раздаялъ волости братъ твои Александръ илi Дмитрии съ новгородци, тобе техъ волостии без вины не лишати. А что ти, княже, пошло на Торожку и на Волоцѣ тивунъ свои дьржати: на своей чясти дьржати, а новъгородьць на своей чясти дьржати. А въ Бежицахъ, княже, тобе, ни твоей княгыни, ни твоимъ бояромъ, ни твоимъ дворяномъ селъ не дьржати, ни купити, ни даромъ приимати, и по всей волости Новгородьскои. А се, княже, воло[с]ти новгородьскые: Волокъ съ всеми волость[м]и, Тържькъ, Бежицѣ, Городьць Палиць, а то есме дали Иванкови, потомъ Мелѣчя, Шипино, Егна, Вологда, Заволоцье, Трѣ, Перемь, Печера, Югра. А в Русу ти, княже, ездити осень, а лѣтѣ не ездити, ездити на Озвадо звѣри гонитъ. А в Ладогу ти, княже, слати осетрьникъ и медовара по грамотѣ отця своего Ярослава. А судъ, княже, отдалъ Дмитрии съ новгородци бежичяномъ и обонижаномъ на 3 лѣта, судье не слати. А из Бежиць, княже, людии не выводити въ свою землю, ни изъ инои волости новгородьскои, ни грамотъ имъ даяти, ни закладниковъ приимати ни княгыни твоеи, ни бояромъ твоимъ, ни дворяномъ твоимъ: ни смерда, ни купцины. А без вины ти мужа волости не лишити. А грамоты ти, княже, не посуживати. А пожне, княже, что пошло тобе и твоимъ мужемъ, то твое. А что былъ отъялъ братъ твои Александръ пожне, а то ти, княже, не надобѣ. А что, княже, братъ твои Александръ дѣялъ насилие на Новѣгородѣ, а того ся, княже, отступи. Дворяномъ твоимъ и тивунимъ погонъ имати, како то пошло. А на томъ ти, княже, на всѣмь хрьстъ цѣловати бес перевода, пpi нашихъ послѣхъ; а мы ти ся, господине княже, кланяемъ. А что, княже, мытъ по твоей земли, и по [и]нои волости, и по всей Суждальскои земли, а то, княже, имати по 2 векши от лодье, и от воза, и от лну, и от хмелна короба. А дворяномъ твоимъ по селомъ у купцевъ повозовъ не имати, разве ратной вести. Тако, княже господине, пошло от дѣдъ и от отець, и от твоихъ и от нашихъ, и от твоего отчя Ярослава.


[1] В прямых скобках восстановлены утраченные и не поддающиеся прочтению места, по аналогии с док. Договорная грамота Новгорода с тверским великим князем Ярославом Ярославичем (1270).

Текст воспроизведен по изданию: Грамоты Великого Новгорода и Пскова. М.-Л.; 1949. С. 10 - 11.

Комментарии
Поиск
Только зарегистрированные пользователи могут оставлять комментарии!
Русская редакция: www.freedom-ru.net & www.joobb.ru

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."